Hyundai Motor we Kia Motors litiý-demir-fosfat (LFP) akkumulýatorlary üçin katod materialyny öndürmekde täze tehnologiýany işläp düzmäge başladylar diýip, ITHome habar berýär.
Taslama Hyundai Motor Group, Kia Motors, Hyundai Steel we katod materiallary bazarynda esasy kompaniýa bolan EcoPro BM-iň gatnaşmagynda döredilýär. Başlangyç Günorta Koreýanyň Söwda, senagat we energiýa ministrligi tarapyndan goldanýar.
Taslamanyň maksady importa garaşlylygy azaltmak, şeýle hem elektromobiller pudagynda tehnologiki bäsdeşlik ukybyny ýokarlandyrmak bolup durýar.
Hyundai Motor we Kia-nyň gözlegler bölüminiň başlygy Sunjun Ýung akkumulýatorlary üpjün etmekde netijeli zynjyry döretmegiň we ösen tehnologiýalary ösdürmegiň elektromobiller bazarynyň geljegi üçin wajypdygyny aýtdy.
Katod materiallaryny öndürmegiň adaty prosessi demriň fosfatyna we sulfatyna litiýniň goşulmagyny öz içine alýar. Hyundai Motor hyzmatdaşlygyň polat-litiý, akkumulýator we awtoulag pudaklarynyň işini birleşdirýändigini aýtdy.
