1-nji oktýabrda dünýäde Ýaşulularyň halkara güni bellenilip geçilýär. Birleşen Milletler Guramasynyň Baş Assambleýasy tarapyndan yglan bu halkara baýram mynasybetli Prezident Serdar Berdimuhamedow Türkmenistanyň ýaşuly nesillerini hem-de ähli halkyny gutlady.
Resmi metbugatça çap edilen hatda döwlet Baştutany bu halkara baýramçylygyň "göwün galkyndyryjy dabaralarynyň il sylagly ýaşulularymyzy, mähriban enelerimizi, ähli watandaşlarymyzy Ýer ýüzünde parahatçylygyň we ösüşiň pugtalandyrylmagyna gönükdirilen belent maksatlarymyzyň töwereginde mäkäm jebisleşdirjekdigine, eziz Watanymyzyň röwşen geljeginiň bähbidine yhlasly, tutanýerli zähmet çekmäge ruhlandyrjakdygyna berk ynanýandygyny" belleýär.
Serdar Berdimuhamedow "tutumly işlerimiziň üstünlikli amala aşyrylmagynda, agzybirligimiziň we jebisligimiziň has-da pugtalandyrylmagynda baý zähmet hem-de durmuş tejribesi bolan ýaşuly nesliň beýik maksatlara, täze üstünliklere ruhlandyrýan dana pikirlerine, paýhasly maslahatlaryna aýratyn ähmiýet berýäris. Siziň her bir maşgalada asudalygy we agzybirligi üpjün etmekde, giň gerimli jemgyýetçilik-syýasy, durmuş-ykdysady özgertmelerimizi amala aşyrmakda alyp barýan işleriňiz, maslahatlaryňyz, goldawlaryňyz, öwüt-ündewleriňiz örän möhümdir. Gözbaşyny müňýyllyklardan alyp gaýdýan bu ajaýyp ýörelgeler nesilleriň arasyndaky üznüksizligi üpjün edýän, halkymyzy jebisleşdirýän, döredijilikli, beýik işlere ruhlandyrýan nusgalyk durmuş mekdebidir" diýip belleýär.
Şeýle hem döwlet Baştutany Türkmenistanyň Garaşsyzlygynyň 33 ýyllyk baýramynyň öň ýanynda geçirilen Türkmenistanyň Halk Maslahatynyň mejlisinde ýaşulularymyzyň döwletli maslahatlarydyr teklipleri esasynda ýurdumyzy we jemgyýetimizi ösdürmek boýunça möhüm çözgütleriň kabul edilendigini nygtaýar.
