28-nji sentýabrynda Nýu-Ýork şäherinde BMG-niň Baş Assambleýasynyň 79-njy mejlisiniň çäklerinde Türkmenistanyň daşary işler ministri Raşid Meredow Kamboja Patyşalygynyň Premýer-ministriniň orunbasary, daşary işler we halkara hyzmatdaşlygy ministri Sok Çenda Sofean bilen duşuşyk geçirdi.
Türkmenistanyň DIM-niň metbugat gullugynyň habar bermegine görä, duşuşykda taraplar iki ýurduň Daşary işler ministrlikleriniň arasyndaky gatnaşyklary berkitmegiň möhümdigini bellediler. Şunuň bilen baglylykda, duşuşygyň dowamynda Türkmenistanyň Daşary işler ministrligi bilen Kamboja Patyşalygynyň Daşary işler we halkara hyzmatdaşlygy ministrliginiň arasynda syýasy geňeşmeleri geçirmek boýunça özara düşünişmek hakynda Ähtnama gol çekildi.
Taraplar iki ýurduň arasyndaky işewürlik we söwda hyzmatdaşlygynyň mümkinçiliklerini beýan etdiler. Şunuň bilen baglylykda, söwda gatnaşyklarynyň mümkinçiliklerini öwrenmek üçin işewür wekiliýetleri we söwda pudagynyň wekillerini alyşmak mümkinçiligi ara alnyp maslahatlaşyldy.
Ministrler şeýle hem Günorta-Gündogar Aziýa ýurtlarynyň assosiasiýasy (ASEAN) bilen bilelikdäki çäreleri guramak we hyzmatdaşlygyň geljegi barada pikir alyşdylar.
