28-nji sentýabrda Nýu-Ýork şäherinde Türkmenistanyň daşary işler ministri Raşid Meredow ÝHHG-niň Baş sekretarynyň wezipesini wagtlaýyn ýerine ýetirijisi, Jedelleriň öňüni almak boýunça merkeziniň ýolbaşçysy Ketrin Firon bilen duşuşyk geçirdi. Bu barada ýurdumyzyň daşary syýasat edarasy habar berýär.
Duşuşygyň barşynda Türkmenistanda häzirki wagtda dowam edýän we geljekki bilelikdäki iri taslamalar hem-de maksatnamalar ara alnyp maslahatlaşyldy.
Taraplar Türkmenistan bilen ÝHHG-niň arasynda syýasy, ykdysady we ynsanperwer ugurlarda uzakmöhletleýin hyzmatdaşlygyň netijeliligine ýokary baha berdiler. Türkmenistanyň sebitleýin howpsuzlygy we durnukly ösüşi pugtalandyrmaga ünsi çekmek bilen, guramanyň işini häzirki görnüşinde mundan beýläk-de kämilleşdirmek ugrunda çykyş edýändigi bellenildi.
R.Meredow ozal ÝHHG-niň çäklerinde öňe sürlen Bitewi howpsuzlyk strategiýasyny, ÝHHG-nyň ekologik maksatnamasyny taýýarlamak we durnukly ulag boýunça degişli düzümi döretmek ýaly teklipleri gaýtadan beýan etdi. Bular Guramanyň işleýşini kämilleşdirmek nukdaýnazaryndan we şol bir wagtyň özünde daşky gurşawy goramak hem-de ulag infrastrukturasyny ösdürmek meselesinde Türkmenistanyň ileri tutýan ugurlaryna jogap berýär.
