14–21-nji sentýabry aralygynda S.A.Nyýazow adyndaky Türkmen oba hojalyk uniwersitetiniň 15 talyby «John Deere» kompaniýasynyň Germaniýadaky we Niderlandlardaky maşyngurluşyk zawodlarynda önümçilik tejribeligini geçdiler. Tejribelikde talyplara ýokary okuw mekdebiniň mehanizasiýa fakultetiniň mugallymlary ýolbaşçylyk etdi diýip, "Türkmenistan: Altyn asyr" elektron neşiri habar berýär.
Tejribelik sapary öňdebaryjy daşary ýurt tejribesini öwrenmek we özleşdirmek hem-de döwrebap önümçilik tehnikalary bilen ýakyndan tanyşmak maksady bilen amala aşyryldy.
Saparyň çäklerinde türkmen talyplary Germaniýanyň Mangeým şäherinde ýerleşýän «John Deere» kompaniýasynyň traktor öndürýän zawodyna, Bruhzal şäherinde «John Deere» kompaniýasynyň traktorçynyň oturýan we dolandyrýan ýerini düzüp ýygnamaga ýöriteleşen zawodyna, Kaýzerslautern şäherinde ýerleşýän Ýewropa tehnologiýalar we innowasiýalar merkezine baryp gördüler. Bu ýerlerde myhmanlar üçin kompaniýanyň bilermenleriniň gatnaşmagyna tanyşdyrmalar guraldy.
Saparynyň dowamynda türkmen wekiliýeti «John Deere» kompaniýasynyň Niderlandlar Patyşalygynyň Horst şäherindäki zawodyna hem baryp gördi. Bu ýerde oba hojalyk tehnikalarynyň özi ýöreýän, pürküji hem-de tirkeg enjamlar ýaly nusgalarynyň önümçiligi ýola goýlupdyr.
«John Deere» kompaniýasy ýurdumyzyň obasenagat toplumynyň öňden gelýän we ygtybarly hyzmatdaşlarynyň biridir. Amerikanyň bütin dünýä belli, eýýäm, 25 ýyldan gowrak wagt bäri oba hojalyk tehnikalarynyň iň döwrebap nusgalaryny hödürläp, türkmen bazarynda özüni tanatdy.
