Türkmenistanyň wekiliýetiniň Nýu-Ýork şäherine amala aşyrýan saparynyň ilkinji gününde - 26-njy sentýabrda daşary işler ministri Raşid Meredow Ýewropada Howpsuzlyk we Hyzmatdaşlyk Guramasynda (ÝHHG) Başlyklyk edýän Malta Respublikasynyň Premýer-ministriniň orunbasary, daşary işler ministri Ýan Borg bilen duşuşdy.
Türkmenistanyň DIM-niň habar bermegine görä, duşuşygyň barşynda taraplar ÝHHG-niň işi bilen baglanyşykly meseleleri ara alyp maslahatlaşdylar.
Taraplar şu ýylyň ahyrynda geçiriljek ÝHHG-niň agza ýurtlarynyň daşary işler ministrleriniň Geňeşiniň mejlisiniň ähmiýetini bellediler.
Şunuň bilen birlikde, iki ýurduň daşary syýasat edaralarynyň ýolbaşçylary Türkmenistan bilen Malta Respublikasynyň arasyndaky ikitaraplaýyn hyzmatdaşlygyň häzirki ýagdaýyny we geljegini ara alyp maslahatlaşdylar.
Şol gün Raşid Meredow Ýewropada Howpsuzlyk we Hyzmatdaşlyk Guramasynyň (ÝHHG) ozalky Baş sekretary, ilçi Helga Şmid bilen duşuşdy.
Duşuşygyň barşynda sebit howpsuzlygy, howanyň üýtgemegi, sanlylaşdyrma, zenanlaryň hukuklaryny we mümkinçiliklerini giňeltmek ýaly ugurlarda özara gatnaşyklary giňeltmek boýunça başlangyçlary nazara almak bilen, hanym Şmidiň Türkmenistan bilen ÝHHG-niň arasyndaky hyzmatdaşlygy pugtalandyrmaga goşan uly şahsy goşandy nygtaldy.
Şeýle hem 26-njy sentýabrda Türkmenistanyň daşary işler ministri Raşid Meredow bilen Ykdysady hyzmatdaşlyk guramasynyň (YHG) Baş sekretary Asad Majid Hanyň arasynda duşuşyk geçirildi.
Duşuşykda taraplar Türkmenistan bilen YHG-niň arasyndaky hyzmatdaşlygyň berkidilýändigini bellediler we özara gatnaşyklaryň möhüm ugurlaryny ara alyp maslahatlaşdylar. Energetika, ulag-aragatnaşyk, söwda-ykdysady bileleşme, sanlylaşdyrmak we medeni gatnaşyklary ösdürmek ileri tutulýan ugurlaryň hatarynda görkezildi. Söhbetdeşler guramanyň çäklerindäki halkara hukuk binýadyny berkitmek we ýurdumyzyň guramanyň işgärler düzümine goşýan goşandy bilen baglanyşykly meseleleriň üstünde aýratyn durup geçdiler.
Şeýle hem YHG-niň Baş sekretary Arkadag şäheriniň halkara derejesindäki üstünliklerine we şäherde innowasiýa çözgütleriniň giňden durmuşa geçirilýändigine ünsi çekip, täze akylly şäherde YHG-niň howandarlygyndaky ýokary derejeli, ilkinji nobatda, durnukly ösüş meselelerine bagyşlanan çäreleri guramaga gyzyklanma bildirdi.
