26-njy sentýabrda BMG-niň Baş Assambleýasynyň nobatdaky mejlisiniň çäklerinde türkmen wekiliýetiniň agzalary Çehiýanyň daşary işler ministri Ýan Lipawski bilen duşuşdy.
Türkmenistanyň DIM-niň habar bermegine görä, duşuşygyň barşynda hyzmatdaşlygy işjeňleşdirmek meseleleri ara alnyp maslahatlaşyldy.
Syýasy-diplomatik ugur babatda iki ýurduň daşary syýasat edaralarynyň derejesinde yzygiderli geçirilýän duşuşyklaryň ähmiýeti nygtaldy. Şunuň bilen baglylykda, taraplar iki ýurduň Daşary işler ministrlikleriniň arasynda Özara düşünişmek hakynda Ähtnamany we Hyzmatdaşlygyň maksatnamasyny işläp düzmek barada ylalaşdylar.
Şol bir wagtyň özünde ikitaraplaýyn gatnaşyklaryň çäklerinde parlamentara hyzmatdaşlygynyň orny bellenildi. Şunuň bilen baglylykda, Çehiýanyň Parlamentiniň Başlygynyň orunbasarynyň 2025-nji ýylda Türkmenistana boljak saparynyň ähmiýeti nygtaldy.
Söwda-ykdysady ugurdaky özara gatnaşyklar barada aýtmak bilen, taraplar bu ugurda bar bolan mümkinçiliklere esaslanmak arkaly, gatnaşyklary giňeltmegiň geljegi dogrusynda pikir alyşdylar.
Taraplar Ykdysady hyzmatdaşlyk boýunça türkmen-çeh iş toparyny döretmek barada ylalaşdylar. Söwda-ykdysady işjeňlige itergi bermek nukdaýnazaryndan Çehiýa Respublikasynyň işewürler wekiliýetiniň şu ýylyň oktýabrynda Aşgabada boljak saparynyň ähmiýeti bellenildi.
