Türkmen wekiliýeti Ýaponiýa bilen söwda-ykdysady gatnaşyklary giňeltmegiň geljegini ara alyp maslahatlaşmak üçin bu ýurda iş saparyny amala aşyrdy. Hususan-da, Ýaponiýada Türkmenistanyň Söwda öýüni açmak mümkinçiligine garaldy diýip, ORIENT habar berýär.
Türkmenistanyň Söwda we daşary ykdysady aragatnaşyklar ministrliginiň we Dokma senagaty ministrliginiň wekillerinden ybarat wekiliýet Ýaponiýanyň Daşary söwda guramasynyň (JETRO) we dokma senagatyna ýöriteleşen ýapon kompaniýalarynyň, şol sanda Masui Co. Ltd., SHIMA SEIKI, Kuraray Trading Co. Ltd, Taishoboseki, Nitivy Co.Ltd kompaniýalarynyň wekilleri bilen duşuşyklary geçirdi.
Gepleşikleriň barşynda türkmen dokma önümlerini ýapon bazaryna eksport etmek mümkinçilikleri öwrenildi. Türkmen tarapy Ýaponiýanyň dokma senagatyndaky öňdebaryjy tehnologiýalar bilen tanyşdy.
