Türkmenistanyň we Russiýa Federasiýasynyň Gahrymany Oleg Kononenko Türkmenistanyň Prezidentini we Halk Maslahatynyň Başlygyny Halk Maslahatynyň mejlisiniň üstünlikli geçirilmegi hem-de Türkmenistanyň Garaşsyzlyk güni bilen gutlady. Kosmonawtyň gutlagy metbugatda çap edildi.
Kononenko 24-nji sentýabrda Aşgabatda geçirilen Halk Maslahatynyň mejlisinde Türkmenistanyň mundan beýläk-de ösmegine we rowaçlanmagyna, onuň raýatlarynyň ýaşaýyş-durmuş derejesiniň, abadançylygynyň has-da ýokarlanmagyna, türkmen halkynyň agzybirliginiň, jebisliginiň pugtalandyrylmagyna gönükdirilen möhüm çözgütleriň kabul edilendigini belledi.
"Şanly senä — Türkmenistanyň Garaşsyzlyk gününe sanlyja gün galdy. Meniň eziz Watanym Türkmenistanyň ýylsaýyn ajaýyp üstünlikleri gazanýandygyna, ykdysadyýetini berkidýändigine, ägirt uly durmuş ugurly maksatnamalary amala aşyrýandygyna, täze şäherleri gurýandygyna, ylmy, bilimi, sporty ösdürýändigine uly buýsanç bilen syn edýärin. Bitarap Türkmenistan dünýä giňişliginde belent abraýdan we hormatdan peýdalanyp, öz möhüm halkara başlangyçlarynyň biragyzdan goldanylmagyny gazanýar.
Türkmenistanyň kosmos pudagynda gazanýan üstünlikleri meniň üçin aýratyn ähmiýete eýedir. Munuň özi ýurdy tehnologik taýdan ösen döwletleriň hataryna goşýar. Türkmenistanyň Prezidenti hormatly Serdar Gurbangulyýewiç Berdimuhamedowa, türkmen halkynyň Milli Lideri Gahryman Arkadag Gurbanguly Mälikgulyýewiç Berdimuhamedowa meniň işim barada edýän yzygiderli aladalary, berýän ünsi, goldawy hem-de ýürekdeşligi üçin tüýs ýürekden hoşallyk bildirmek isleýärin. Size tüýs ýürekden sagbolsun aýdýaryn" diýip, Kononenko belleýär.
