25-nji sentýabrda Prezident Serdar Berdimuhamedowyň tabşyrygy boýunça Türkmenistanyň raýatlygyna kabul edilen adamlara pasportlar gowşuryldy. Dabara Döwlet migrasiýa gullugynda geçirildi diýip, TDH habar berýär.
Öň habar berşimiz ýaly, Türkmenistanyň Prezidentiniň Ministrler Kabinetiniň giňişleýin mejlisinde gol çeken Permanyna laýyklykda, ýurdumyzyň çäklerinde hemişelik ýaşaýan hem-de 29 milletiň wekili bolup durýan 1 müň 146 adam Türkmenistanyň raýatlygyna kabul edildi. Şeýle-de 6 döwletiň raýatlary we 15 milletiň wekilleri bolup durýan 134 adama Türkmenistanda ýaşamak üçin ygtyýarnamalar berildi.
Pasportlary gowşurmak dabarasynda oňa gatnaşyjylar Türkmenistanyň Prezidentine raýatlygy bolmadyk adamlaryň jemgyýetimiziň doly hukukly agzalary bolmagy, olaryň abadan durmuşy üçin ähli şertleri döretmäge berýän ägirt uly ünsi üçin tüýs ýürekden hoşallyklaryny beýan etdiler.
Köp ýyllaryň dowamynda Türkmenistanyň Prezidentiniň Permanlary bilen, ýurdumyzda ýaşaýan we şol bir wagtyň özünde hiç bir döwletiň raýaty bolmadyk 30 müň 998 adam Türkmenistanyň raýatlygyna kabul edildi. Häzirki wagta çenli 5 müň 18 daşary ýurt raýatyna we raýatlygy bolmadyk adamlara Türkmenistanda ýaşamak üçin ygtyýarnama berildi.
Türkmenistan BMG-niň esasy halkara hukuk resminamalaryna — Bosgunlaryň hukuk ýagdaýy hakynda, Apatridleriň derejesi hakynda, Raýatsyzlygy azaltmak hakynda Konwensiýalara goşulmak bilen, öz üstüne alan borçnamalaryna ygrarlydygyny iş ýüzünde tassyklaýar. Halkara ynsanperwerlik hukugynyň kadalarynyň milli kanunçylyga ornaşdyrylmagy, apatridlere we beýleki möhüm migrasiýa meselelerine bagyşlanan wekilçilikli forumlaryň geçirilmegi munuň aýdyň güwäsidir.
