13-14-nji sentýabrda Astrahanda Türkmenistanyň Russiýa Federasiýasyndaky Konsullygynyň guramagynda mini-futbol boýunça ýaryş geçirildi. Ýaryş Magtymguly Pyragynyň 300 ýyllygyna bagyşlandy diýip, Türkmenistanyň DIM-niň metbugat gullugy habar berdi.
Bäsleşige Astrahan oblastynda we Stawropol sebitinde ýaşaýan türkmen diasporasynyň wekillerinden ybarat bolan toparlar, şeýle hem Astrahan oblastynda bilim alýan türkmen talyplaryndan ybarat bolan Konsullygyň topary gatnaşdylar.
Ýaryşyň netijeleri boýunça ýeňiji bolan toparlara Kubok we medallar gowşuryldy.
14-nji sentýabrda Bişkek şäherinde hem türkmen diasporasynyň wekilleriniň we Bişkegiň ýokary okuw mekdeplerinde okaýan talyplaryň arasynda stoluň üstünde oýnalýan tennis boýunça ýaryş geçirildi.
Türkmenistanyň Gyrgyz Respublikasyndaky ilçihanasy tarapyndan guralan bu sport ýaryşy hem beýik türkmen şahyry Magtymguly Pyragynyň doglan gününiň 300 ýyllygyna bagyşlandy.
Ýaryşyň ahyrynda onuň ýeňijilerine we gatnaşyjylara Türkmenistanyň ilçihanasynyň adyndan Magtymguly Pyragynyň goşgular ýygyndysy we beýleki ýadygärlik sowgatlary gowşuryldy.
