17-nji sentýabrda Türkmenistanyň daşary işler ministriniň orunbasary Mähri Bäşimowa Atom energiýasy boýunça halkara agentliginiň (IAEA) Baş konferensiýasynyň 68-nji sessiýasynyň umumy mejlisinde çykyş etdi.
M.Bäşimowa öz çykyşynda Türkmenistan bilen IAEA-nyň arasyndaky işjeň hyzmatdaşlygyň netijesinde ileri tutulýan ugurlar boýunça dürli derejelerde geňeşmeleri geçirmek tejribesiniň ýola goýlandygyny belledi. Türkmenistanyň amala aşyrýan ähli tagallalary Agentlik bilen geljegi uly ugurlarda hyzmatdaşlygy berkitmäge ygrarlydygyny görkezýär.
18-nji sentýabrda türkmen wekiliýetiniň IAEA-nyň Baş direktory Rafael Grossi bilen duşuşygy geçirildi.
Duşuşygyň dowamynda taraplar Türkmenistan bilen IAEA-nyň arasyndaky hyzmatdaşlygyň ileri tutulýan ugurlary dogrusynda pikir alyşdylar.
Ileri tutulýan ugurlaryň hatarynda lukmançylyk, hususan-da onkologiýa kesellerine garşy göreşmek ugrundaky hyzmatdaşlyk görkezildi.
Türkmen wekiliýetiniň Wena amala aşyran saparynyň çäginde M.Bäşimowanyň Ýadro synaglaryny ählumumy gadagan etmek barada Şertnamasy guramasynyň (CTBTO) Ýerine ýetiriji sekretary Robert Floýd bilen duşuşygy geçirildi.
Duşuşygyň barşynda Türkmenistan bilen CTBTO-nyň arasyndaky hyzmatdaşlygyň esasy ugurlary ara alnyp maslahatlaşyldy.
Taraplar Ýadro synaglaryny ählumumy gadagan etmek barada Şertnamasynyň güýje girmeginiň hem-de parahatçylygy we durnuklylygy üpjün etmäge gönükdirilen Türkmenistanyň hemişelik Bitaraplyk syýasatynyň ähmiýetini bellediler.
