Warşawa arheologiýa muzeýiniň arheologlary şu ýylyň awgust aýynda takmynan ýaşy 2300 ýyl bolan keltleriň bürünç tuwulgasyny tapdylar. Bu tapyndy Warşawanyň takmynan 105 km demirgazygynda ýerleşýän Lysa-Gura arheologiki ýerinde tapyldy.
Konus görnüşli depesi bolan "berru" dizaýnynda ýasalan tuwulga öň deri ýa-da mata bilen örtülipdir. Ol eýesiniň ýokary derejesine, şeýle hem Ýewropanyň bu böleginde keltleriň ýaşandygyna şaýatlyk edýär.
Şu wagta çenli kelt taýpalary diňe Polşanyň günorta bölegi bilen baglanyşdyrylýardy. Bu taýpalar bu ýere takmynan b.e. öň 400-nji ýylda söwda ýollaryna we ýantar ýaly gymmat bahaly daşlaryň çeşmelerine gözegçilik etmek üçin göçüp gelipdirler.
Lysa-Guradaky gazuw-agtaryş işleri XIX asyrdan bäri dowam edýär we bu ýer köplenç hazyna rowaýatlary bilen baglanyşdyrylýar. Arheologlar tuwulgadan başga-da, Günorta Ýewropadan demir paltalar, gylyçlar, şaý-sepler we iş gurallary ýaly 300-den gowrak ýadygärlik tapdylar.
