Warşawa adam başyna düşýän jemgyýetçilik kitaphanalarynyň sany boýunça dünýäde birinji orny eýeledi. Bütindünýä şäher medeniýetleri forumynyň maglumatlaryna görä, Polşanyň paýtagtynda her 100 000 ýaşaýja 11,98 kitaphanadan düşýär.
Ikinji Jahan urşundan soň şäheriň dikeldilýän döwründe kitaphana ulgamynyň ösdürilmegi ileri tutulýan ugur boldy. Häzirki wagtda Warşawanyň kitaphanalary diňe bir bilim beriş funksiýasyny däl, eýsem özara gatnaşygyň we medeni çäreleriň jemgyýetçilik giňişligi hökmünde hem hyzmat edýär.
Seul hem öňdebaryjy bolmagynda galýar. 2023-nji ýylda Günorta Koreýanyň paýtagtyndaky şäheriň kitaphanalaryna 22 milliondan gowrak adam geldi. Kitaplara elýeterlilikden başga-da, olar leksiýalary, döredijilik ussatlygy sapaklaryny, bilim beriji maksatnamalary we sanly sowatlylyk kurslaryny hödürleýärler.
Brýussel özboluşly tejribäni hödürleýär, kitaphana ulgamy Belgiýanyň baý dil dürlüligini görkezýär. Fransuz we golland dilinde gepleýän jemgyýetler öz kitaphana ulgamlaryny goldap, ilaty birnäçe dilde edebiýatlar we maglumat çeşmeleri bilen üpjün edýär.
Sanly tehnologiýalaryň ösýändigine garamazdan, jemgyýetçilik kitaphanalary bilimlere elýeterliligi üpjün etmekde, bilim berişi goldamakda we şäherleriň medeni durmuşyny ösdürmekde möhüm rol oýnamagyny dowam etdirýär.
