Luwrdaky şa gymmatlyklarynyň ogurlanmagy bilen bagly jenaýat işini alyp barýan derňewçiler Belgiýa bilen arabaglanyşykly täze çaklamany gözden geçirýärler.
Le Parisien neşiriniň habar bermegine görä, ýük ogurlygy baradaky başga bir adaty derňew wagtynda Belgiýanyň polisiýasy Gündogar Ýewropadan bolan birnäçe adamy (N.Abdulaý, A.Gelamalla, K.Sliman we H.Raşid) tussag etdi. Olaryň ykjam telefonlary barlanan wagtynda bolsa Luwruň, şol sanda 2025-nji ýylyň 19-njy oktyabrynda fransuz şa täjiniň ogurlanan ýeri bolan Apollon galereýasynyň suratlary ýüze çykaryldy.
Ýygnanan subutnamalar Medeni gymmatlyklaryň bikanun söwdasyna garşy göreşmek boýunça merkezi müdirlige geçirildi. Hünärmenler suratlaryň asyl nusgasyny we olaryň bolup geçen ogurlyk bilen nähili dahylynyň bardygyny anyklaýarlar.
Umumy bahasy 88 million ýewrodan geçýän sekiz sany gymmatbaha şaý-sep henizem tapylanok. Derňew gullugy birnäçe çaklamalary, şol sanda gymmatlyklaryň ogurlyk harytlaryň hyrydarlary arkaly alnyp, gaýtadan satylan bolmagyny ýa-da indiki satuwlar üçin sökülip, aýry-aýry haryt görnüşine getirilen bolmagyny-da ünsden düşürenok.
