ChatGPT çat-boty tejribelik geçýän (stažýor) lukmanlara garanyňda, çagalarda çylşyrymly dem alyş kesellerini anyklamakda has täsirli netijeleri görkezdi. Bu barada Ýewropanyň respirator jemgyýetiniň kongresinde hödürlenen täze barlagda aýdylýar diýip, Medical Xpress habar berýär.
Edinburgda ýerleşen Çagalaryň we ýaşlaryň Patyşalyk keselhanasynda geçirilen barlagyň dowamynda ChatGPT mukowissidoz, demgysma we döş kapasasynyň ýokanç keselleri ýaly, çylşyrymly kliniki ýagdaýlary anyklamakda üstünlik gazandy.
Barlagçylar hakyky durmuşda duşýan kliniki ýagdaýlary ulandylar we tejribesi dört aýdan az bolmadyk stažýor lukmanlaryň we emeli aňyň öňünde kesel kesgidini anyklamak boýunça çylşyrymly meseläni goýdular.
OpenAI tarapyndan işlenip düzülen ChatGPT 3.5-iň jogaby iň ýokary orta bal - mümkin bolan 9 baldan 7 bal alyp, iň “ynsanperwer” jogap diýlip ykrar edildi. Google Bard (häzirki Gemini) hem-de Microsoft Bing pes netijeleri görkezdiler we hünärmenler olaryň jogaplarynyň tebigatyny aňsatlyk bilen ýüze çykardylar.
Gözlegiň esasy awtory, doktor Manjit Naraýanan iri dil modelleriniň ilkinji gezek hakyky durmuş tejribesine mümkin boldugyça golaý şertlerde synagdan geçirilýändigini nygtady. Barlag emeli aňyň keselleri anyklamakda gymmatly gural bolup biljekdigini, ýöne kliniki tejribä ornaşdyrmazdan ozal onuň takyklygyny we howpsuzlygyny öwrenmegiň möhümdigini görkezdi.
