Awstraliýaly alymlar leýkozy we beýleki gan kesellerini bejermegiň şahsy usullaryny döretmek üçin esas bolup biljek açyş etdiler diýip, Nature Biotechnology-da çap edilen barlagyň netijesine salgylanýan Medical Xpress portaly habar berýär.
Merdokyň Çagalar ylmy-barlag institutynyň (MCRI) barlagçylary dünýäde ilkinji bolup adam ganynyň sütün öýjüklerini emeli usulda ösdürip ýetişdirdi.
Döredilen sütün öýjükleri eritrositleri, leýkositleri we trombositleri hem öz içine alýan ähli gyzyl gan öýjüklerini öndürmäge ukyplydyr. Alymlar immun ýetmezçiligi bolan syçanlarda synag geçirip, ösdürilip ýetişdirilen öýjükleriň süňk ýiliginde üstünlikli kök alýandygyny we göbek ganynyň öýjükleri bilen deň derejede işleýändigini subut etdiler.
Täze tehnologiýanyň möhüm artykmaçlygy öýjükleri transplantasiýa etmezden ozal, olaryň häsiýetlerini ýitirmezden, doňduryp bolýanlygydyr. Bu prosesi ep-esli aňsatlaşdyrýar we hassalar üçin has elýeterli edýär.
“Indi näsagyň islendik öýjügini alyp, ony sütün öýjüklerine gaýtadan programmirläp, transplantasiýa üçin laýyk gan öýjüklerine öwrüp bileris. Ozal süňk ýiliginiň näsazlyklaryny bejermek üçin göçürilip bilinjek sütün öýjüklerini döretmek mümkin däldi "-diýip, barlagyň ýolbaşçysy Elizabet Ng gürrüň berdi.
Indiki ädim - geljek bäş ýylda adamlarda kliniki synaglary geçirmek meýilleşdirilýär diýip, MCRI-niň professory Endrýu Elefanti aýtdy. Netijeler oňyn bolsa, süňk ýiliginiň we ganyň donorlaryny gözlemek gerek bolmaz, bu gan kesellerini bejermekde şahsylaşdyrylan lukmançylygyň täze eýýamyny açar diýip, Daily Mail ýazýar.
