Aşgabadyň Enäniň we çaganyň saglygyny goraýyş ylmy-kliniki merkezinde we Daşoguzyň Enäniň we çaganyň saglygyny goraýyş merkezinde kislorod stansiýalary oturdyldy. Bu başlangyjy Türkmenistanyň Saglygy goraýyş we derman senagaty ministrligi BMG-niň Çagalar gaznasy bilen bilelikde amala aşyrdy diýip, "Türkmenistan: Altyn asyr" elektron neşiri habar berdi.
Kislorod ýiti ýokanç kesellerini bejermek we köp sanly lukmançylyk şertlerini dolandyrmak, şeýle hem umumy saglyk görkezijilerini gowulandyrmak üçin zerur lukmançylyk çeşmesidir.
Şeýle hem ÝUNISEF stansiýalaryň doly ýagdaýda işlemegini we milli saglyk ulgamyna ornaşdyrylmagyny üpjün etmek üçin tehniki kömek berer.
ÝUNISEF-iň Türkmenistandaky wekiliniň orunbasary Aleksandru Nartea kislorodyň elýeterliligini ýokarlandyrmagyň eneleriň, täze doglan bäbekleriň we çagalaryň saglygy üçin möhüm ähmiýete eýe bolup biljekdigini we Durnukly ösüş maksatlaryna (DÖM) ýetmäge ýardam etjekdigini aýtdy. ÝUNISEF mundan beýläk hem Saglygy goraýyş we derman senagaty ministrligi bilen ýiti ýokanç keselleriniň bejergisiniň häzirki zaman usullaryny kliniki okuw meýilnamalaryna ornaşdyrmak üçin ýakyn hyzmatdaşlygy dowam etdirer.
