Şu gün - 30-njy awgustda Aşgabatda «Garagum» myhmanhanasynyň uly mejlisler zalynda Türkmenistanyň we Owganystanyň wekiliýetleriniň giňeldilen düzümdäki duşuşygy geçirildi. Onuň jemleri boýunça özara gyzyklanma bildirilýän ugurlarda birnäçe resminamalara gol çekildi diýip, TDH habar berýär.
Duşuşyga türkmen tarapyndan ýurdumyzyň Ministrler Kabinetiniň Başlygynyň degişli orunbasarlary, degişli ministrlikleriň we pudaklaýyn dolandyryş edaralaryň ýolbaşçylary, owgan tarapyndan bu ýurduň Magdan we nebit önümleri ministriniň wezipesini ýerine ýetirijisi H.Badriniň ýolbaşçylygyndaky wekiliýetiň agzalary we köpçülikleýin habar beriş serişdeleriň wekilleri gatnaşdylar.
Duşuşygyň dowamynda taraplar ileri tutulýan ugurlarda özara gatnaşyklary giňeltmegiň oňyn depginini nygtap, dürli ugurlarda netijeli gatnaşyklary giňeltmegi dowam etmäge taýýardyklaryny tassykladylar.
Bar bolan kuwwatlyklary durmuşa geçirmekde bilelikdäki tagallalaryň birleşdirilmeginiň ýakyn wagtlarda türkmen-owgan söwda-ykdysady hyzmatdaşlygyna hil taýdan täze many-mazmun bermäge, özara haryt dolanyşygyny düýpli artdyrmaga, onuň düzümini we gerimini diwersifikasiýalaşdyrmaga mümkinçilik berjekdigi bellenildi.
Türkmenistanyň we Owganystanyň wekiliýetleriniň giňeldilen düzümdäki duşuşygynyň ahyrynda ikitaraplaýyn resminamalara gol çekmek dabarasy boldy. Şonda iki ýurduň arasynda degişli ugurlar boýunça, hususan-da:
- – Türkmenistanyň Energetika ministrligi bilen Owganystanyň «Da Afghanistan Breshna Sherkat» döwlet kompaniýasynyň arasynda Türkmenistan-Owganysatn-Pakistan elektrik geçirijisiniň taslamasyny durmuşa geçirmekde hyzmatdaşlyk etmek boýunça özara düşünişmek hakynda Ähtnama;
- – Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmendemirýollary» agentligi bilen Owganystanyň Jemgyýetçilik işleri ministrliginiň arasynda Turgundy demirýol bekedinde guruljak desgalaryň gurluşygy boýunça hyzmatdaşlyk etmek barada özara düşünişmek hakynda Ähtnama;
- – Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmendemirýollary» agentligi bilen Owganystanyň Jemgyýetçilik işleri ministrliginiň arasynda gurulmagy meýilleşdirilýän Turgundy-Hyrat demir ýolunyň ugrundaky takmynan 22 kilometr Türgündy-Sanabar böleginiň Iş meýilnamasyna;
- – «TAPI Pipeline Company Limited» paýdarlar kompaniýasy bilen Owganystanyň «Türkmenistan-Owganystan-Pakistan-Hindistan» gaz geçiriji taslamasy babatynda Kabul edýän tarapynyň Hökümeti bilen Ylalaşyga gol çekildi.
Şeýlelikde, Türkmenistanyň we Owganystanyň wekiliýetleriniň arasynda geçirilen giňeldilen düzümdäki duşuşyk we onuň netijesi boýunça gol çekilen resminamalar iki goňşy ýurduň özara bähbitli hyzmatdaşlygy has-da ösdürmäge we giňeltmäge uly itergi bermäge gönükdirilendir.
