Mälim bolşy ýaly, Türkmenistanyň Halk Maslahatynyň Prezidiumynyň Karary bilen, şu ýylyň 24-nji sentýabrynda Aşgabat şäherindäki Maslahat köşgünde Halk Maslahatynyň nobatdaky mejlisi geçiriler. Häzirki wagtda tutuş ýurdumyz boýunça, şol sanda Türkmenistanyň Prezidentiniň ýanyndaky Döwlet gullugy akademiýasynda bu döwlet ähmiýetli çärä bagyşlanan taýýarlyk işleri geçirilýär.
Akademiýada bu möhüm jemgyýetçilik-syýasy waka, onuň ähmiýeti babatda wagyz-nesihat duşuşyklary, söhbetdeşlikler geçirilýär.
Halk häkimiýetiniň iň ýokary wekilçilikli edarasy ýurdumyz üçin möhüm meseleleri ara alyp maslahatlaşmak we uzak möhletleýin maksatlary kesgitlemek üçin adatça öz mejlislerini Garaşsyzlyk baýramynyň öňüsyrasynda geçirýär. Milli forumda ilatyň dürli gatlaklarynyň giňden wekilçilik etmegi, erkin pikir alyşmak we jemgyýetçilik pikirine esaslanýan degişli kararlaryň kabul edilmegi Halk Maslahatynyň işiniň esaslanýan demokratik ýörelgelere, ata-babalaryň köpçülikleýin pikir alyşmak we döwlet hem jemgyýet üçin möhüm kararlar kabul etmek baradaky paýhasly däplerine wepalylygyny tassyklaýar.
Türkmenistanyň Prezidentiniň ýanyndaky Döwlet gullugy akademiýasy ýokary hünär bilimden soňky çuňlaşdyrylan bilim berýän döwlet edarasydyr. Akademiýanyň esasy maksady - Türkmenistanyň Prezidentiniň tagallalary esasynda, ýurdumyzyň dürli ulgamlarynda zähmet çekýän ýokary bilimli döwlet gullukçylaryny, hünärmenleri gaýtadan taýýarlamakdan we olaryň hünär derejesini ýokarlandyrmakdan, magistr maksatnamasy boýunça okatmakdan hem-de döwlet dolandyryşynyň ylmy we usulyýet binýadyny döretmekden, şeýle hem bu işi kämilleşdirmek boýunça teklipleri işläp taýýarlamakdan ybaratdyr.
