17-nji awgustda Gurbanguly Berdimuhamedow “Arçman” şypahanasyna baryp görmeginiň çäklerinde dynç alyş pursatlaryny özüniň agtyjaklary bilen bilelikde geçirdi. Bu barada “Watan” habarlar gepleşiginde habar berildi.
Türkmen halkynyň Milli Lideri gezelenjiň dowamynda agtyjaklaryna “Arçman” şypahanasynyň ähmiýeti we bu ýerleriniň tebigy aýratynlyklarynyň özboluşlylygy barada gürrüň berdi.
Gurbanguly Berdimuhamedow Magtymguly Pyragynyň eserler ýygyndysyndan ybarat bolan täze kitabyň sahypalaryny agdaryşdyryp, beýik söz ussadynyň goşgularyny okady.
Şeýle hem türkmen halkynyň Milli Lideri agtyklarynyň dynç alyş möwsümi döwründe öwrenen bilimleri, olaryň daşary ýurt dillerini öwrenmäge bolan höwesleri bilen gyzyklandy.
Arçmanyň çägi boýunça gezelenjiň adamlar, aýratyn-da, çagalar üçin oňyn täsiriniň bardygyny belläp, Gurbanguly Berdimuhamedow döwrebap seýilgähde hereket etmegiň saglygyň baş şertidigini belledi.
