14-nji awgustda Ankara şäherinde Türkmenistanyň we Türkiýäniň Daşary işler ministrlikleriniň arasynda syýasy geňeşmeler geçirildi. Türkmen tarapyna wise-premýer, daşary işler ministri Raşid Meredow, türk tarapyna Türkiýäniň daşary işler ministri Hakan Fidan ýolbaşçylyk etdi diýip, Türkmenistanyň DIM-inda habar berdiler.
Diplomatlar syýasy-diplomatik gatnaşyklary ösdürmek, parlamentara hyzmatdaşlygy giňeltmek, şertnama-hukuk binýadyny kämilleşdirmek bilen baglanyşykly meseleleriň giň toplumyna garadylar. Ministrler Türkmenistan bilen Türkiýe Respublikasynyň söwda-ykdysady we ynsanperwer ulgamlarda ikitaraplaýyn hyzmatdaşlyga hem-de halkara we sebit guramalaryň çäklerindäki gatnaşyklara aýratyn üns berýändiklerini tassykladylar.
Ykdysady hyzmatdaşlygyň giňeldilmegi boýunça hereketleri utgaşdyrmaklygyň zerurdygyny nygtap, taraplar Ykdysady hyzmatdaşlyk boýunça Hökümetara türkmen-türk toparynyň we Türkmen-türk işewürler geňeşiniň orny barada belläp geçdiler. Energetika pudagy, şeýle hem ulag-üstaşyr geçelgeleriniň ýola goýulmagy bilen bagly meseleler ara alnyp maslahatlaşyldy.
13-nji awgustda Türkiýäniň Daşary işler ministrliginiň binasynda konsullyk meseleleri boýunça türkmen-türk geňeşmeleri, ikitaraplaýyn gatnaşyklaryň şertnama-hukuk binýadyny kämilleşdirmek we tükelleýiş işlerini geçirmek boýunça geňeşmeler, şeýle hem Türkmenistanyň we Türkiýäniň daşary syýasy edaralarynyň maglumat howpsuzlygy bölümleriniň ýolbaşçylarynyň duşuşygy geçirildi.
Geňeşmelere Türkmenistanyň we Türkiýäniň DIM-leriniň hem-de degişli pudak edaralarynyň wekilleri gatnaşdylar.
Konsullyk meseleleri boýunça geňeşmeleriň dowamynda taraplar konsullyk we wiza ugrundaky birnäçe meseleleri giňişleýin ara alyp maslahatlaşdylar. Türkmenistanyň we Türkiýe Respublikasynyň konsullyk gulluklarynyň arasynda tejribe alyşmak boýunça tekliplere seredildi.
Şeýle hem Türkiýä amala aşyrylan saparyň çäklerinde Raşid Meredowyň ýolbaşçylygyndaky Türkmenistanyň wekiliýeti Magtymguly Pyragynyň ýadygärligini hatyralamak üçin Ankara şäheriniň «Türkmenistan» seýilgähinde ýerleşýän türkmen edebiýatynyň nusgawy şahyry we akyldarynyň ýadygärligine gül çemenini goýdy.
