Pekindäki sürüjilik mekdepleriniň birinde sürüjilik sapaklaryny instruktorlaryň ýerine emeli aňly awtoulaglar alyp barýar diýip, South China Morning Post gazeti habar berýär.
Hytaýly inženerler tarapyndan işlenip düzülen, awtoulagdaky AI (emeli aň) ulgamy animasiýa we wizual görkezmeleri ulanyp, sürmek boýunça ädimme-ädim gözükdirmelerini berýär. Ýalňyşylan halatynda bolsa, AI ony aýdýar we nädip düzetmelidigini düşündirýär. Eger okuwçy howply ýagdaýa düşse, AI heläkçiligiň öňüni almak üçin awtopiloty işe girizýär.
Okatmakdan başga-da, şeýle ulaglar inspektor gatnaşmazdan, özleri synagdan geçip biler. Instruktorlar okatmak işine gönüden-göni gatnaşmasa-da, synag meýdançasynda galmak bilen, bir wagtyň özünde birnäçe ulagyň hereketlerine gözegçilik edýärler.
Bu ulgam sürüjilik mekdeplerine çykdajylary kemeltmäge, instruktorlaryň sanyny azaltmaga we okuwçylaryň sanyny köpeltmäge mümkinçilik berýär. Geljekde şuňa meňzeş AI-li okuw ulgamyny tutuş ýurtda ornaşdyrmak meýilleşdirilýär.
