Kaliforniýa uniwersitetiniň Terasaki fakultetiniň alymlary janly dokumalary we beden agzalaryny 3D çap etmek üçin biologiki gidrogeli döretmekde towuk ýumurtgasynyň agyny ulandylar diýip, Intersting Engineering ýazýar.
Barlagçylar beloga ýagtylygyň täsiri astynda islendik şekilli üç ölçegli modelleri döretmäge mümkinçilik berýän fotopolimerizasiýa häsiýetini berdi.
Gidrogeli almak üçin barlagçylar metakril turşusyny ulanyp, ýumurtganyň agyna metakril toparlaryny goşdular. Bu kislota belogyň ýagtylygyň täsiri astynda gatylaşmagyny üpjün edýär we modeliň gatlaklarynyň arasynda berk baglanyşyk döredýär.
Bu açyş biologiki gurluşlaryň 3D çap edilişiniň bahasyny ep-esli arzanlatmak bilen, ony has elýeterli eder. Belogyň özi adamyň beden agzalaryna meňzeş bolmasa-da, gorag, iýmit we şekil bermek bilen ýöriteleşdirilen öýjükleriň ösmegi üçin amatly esas döredýär. Barlagçylar bu çemeleşmede dokuma inženerçiligi we dikeldiş lukmançylygy üçin uly mümkinçilikleri görýärler.
“Elýeterli tebigy baýlyklary ulanmak we olary akylly himiki modifikasiýalar arkaly gowulandyrmak bilen, şahsylaşdyrylan dikeldiş lukmançylygy üçin täze mümkinçilikleri açýarys. Şeýle üstünlikler beden agzalarynyň köp sanly näsazlygyny, ýürek-damar kesellerini we rak keselini bejermek üçin has täsirli we elýeterli çözgütleri taýýarlamak ugrundaky işimizde möhüm ähmiýete eýe" – diýip, alymlar belleýärler.
