Şwesiýanyň Eland adasynyň kenaryndan 58 metr çuňlukda guwwaslar XIX asyra degişli gark bolan ýelkenli gämini tapdylar. Gämide oňat ýagdaýda saklanan 100-den gowrak çüýşe şampan, çakyr, Selters nemes kompaniýasynyň mineral suwy we farfor bar eken diýip, BBC habar berýär.
Hünärmenleriň pikirine görä, gämi heläkçiligi 1850-1867-nji ýyllar aralygynda bolup geçipdir. Baltictech guwwaslar kompaniýasynyň ýolbaşçysy Tomaş Stahura ýüküň rus imperatory Nikolaý I üçin niýetlenen bolmagynyň mümkindigini öňe sürýär. Bu wersiýa XIX asyryň ortalarynda selter suwunyň Russiýada aýratyn önüm hasaplanýandygy bilen tassyklanýar, ol diňe ýokary gatlagyň wekillerine elýeterli bolupdyr.
Stakhura: "Ol juda gymmatly bolansoň, polisiýa esgerleriniň goragy astynda daşalypdyr" – diýip, belleýär.
Taryhy maglumatlara görä, 1852-nji ýylda şa gämilerinden biri, hakykatdanam, bu sebitde ýitirilipdir diýip, Meduza portaly belleýär.
Häzirki wagtda ýük Baltika deňziniň düýbünde galýar. Baltictech kompaniýasy tapyndy barada Şwesiýanyň hökümetine habar berdi, gymmat bahaly artefaktlar ýokary çykarylmazdan ozal hökümet degişli resminamalary resmileşdirmeli.
Tomaş Stahura BBC bilen bolan söhbetdeşlikde: "Ol 170 ýyllap şol ýerde ýatypdyr, şonuň üçin, goý, ýene bir ýyl ýatsyn" - diýdi.
