Braziliýanyň ýüz keşplerini dikeltmek boýunça kazyýet-lukmançylyk hünärmeni Sisero Morais "Gazaply" lakamly rus şasy Iwan IV-iň (1530-1584) üç ölçegli portretini döretdi diýip, Britaniýanyň The Daily Mail gazeti habar berýär.
Moraisiň nobatdaky işiniň sowet antropology Mihail Gerasimowyň 1963-nji ýylda döreden Gazaply Iwan heýkeline ep-esli meňzeşligi bar.
Gerasimow arheologlar toparynyň ýolbaşçylaryndan biri bolup, Moskwa Kremliniň Arhangelsk soborynda patyşanyň we onuň ogullarynyň mazaryny açypdy, soň bolsa onuň beýlebir gowy saklanmadyk kelleçanagy boýunça onuň keşbini dikeldipdi. Gerasimow öz usuly bilen taryhy şahsyýetleriň 200-den gowragynyň heýkeltaraşlyk portretlerini döretdi.
Morais Gerasimowyň rekonstruksiýasyny, 1564-nji ýylda neşir edilen "Apostol" kitabynyň daşky sahabyndaky Iwan Groznynyň portretini we patyşanyň döwürdeşleriniň taryhy subutnamalaryny ulandy.
Ol modeli Iwan IV-iň kellesiniň kompýuter modeliniň parametrlerine mümkin boldugyça ýakynlaşdyrmak üçin, kellesi meňzeş gurluşly meýletinçileriň maglumatlaryny ulanmak bilen anatomiki deformasiýa usulyndan peýdalandy.
"Ýeke-täk tapawudy - aşaky dodagy bilen eňegi" - diýip, braziliýaly hünärmen bu taslamanyň diňe bir Rusyň hökümdarynyň keşbini täzeden dikeltmäge däl, eýsem, terjimehalyny hem öwrenmäge mümkinçilik berendigini aýtdy.
Morais 3D modelirleme arkaly süňk galyndylaryndan onlarça taryhy şahsyýetiň ýüzüni täzeden gurandygy bilen tanalýar.
