Wenerada ýaşaýşyň bardygyny aňladyp biljek iki himiki birleşme bolan ammiak we fosfin tapyldy. Bu barada Angliýadaky Milli Astronomiýa Assambleýasynyň alymlaryna salgylanýan The Guardian habar berýär.
Londonyň Imper kollejiniň gözlegçileri “Jeýms Klark Makswell” teleskopynyň kömegi bilen Wenera atmosferasynda fosfiniň bardygyny tassykladylar. Ondan öň 2020-nji ýylda Wenerada fosfiniň tapylmagy alymlaryň arasynda jedel döredipdi.
Kardiff uniwersitetinden bolan başga bir gözlegçiler topary, Green Bank teleskopyny ulanyp, Wenerada ammiagyň tapylandygyny tassykladylar. Planetanyň atmosferasynda ammiagyň bardygyny belli atmosfera ýa-da geologiki amallaryň üsti bilen düşündirmek kyn.
Ýerdäki fosfin we ammiak, köplenç janly organizmler tarapyndan öndürilýär. Wenerada bu himiki serişdeleriň tapylmagy, ýaşaýşyň bar bolmagynyň gönüden-göni subutnamasy däldir. Ýöne bu açyşlar uly gyzyklanma döredip, has köp gözlegleri talap edýär.
Wenera Gün ulgamynyň iň gyzgyn planetasy bolup, onuň ýerüsti temperaturasy +450 °C ýetýär. Şeýle-de bolsa, Weneranyň takmynan 50 km belentlikdäki şertleri Ýerdäki şertlere ýakyndyr. Bu bolsa, ony ýaşaýyş üçin amatly edip biler.
