15-nji iýulda Daşkent şäherinde «Türkmenistanda öndürilen» atly türkmen harytlarynyň milli sergisi açyldy. Serginiň açylyş dabarasyna Türkmenistanyň wise-premýeri B.Atdaýew, Özbegistanyň Premýer-ministriniň orunbasary Ž.Hojaýew, iki ýurduň Söwda-senagat edaralarynyň wekilleri, telekeçiler, Özbegistanda akkreditirlenen diplomatik wekilhanalaryň ýolbaşçylary we wekilleri hem-de köpçülikleýin habar beriş serişdeleriniň wekilleri gatnaşdy diýip, Türkmenistanyň DIM-inde habar berdiler.
Sergi Türkmenistanyň milli ykdysadyýetiniň gazanan üstünliklerini, ykdysady ösüşiň mümkinçiliklerini we onuň geljegi uly bolan ugurlaryny görkezýär. Sergide myhmanlar 13 sany döwlet edarasynyň we dürli ugurlar boýunça 60 sany türkmen kärhanalarynyň hem-de kompaniýalarynyň önümleri we hyzmatlary bilen tanşyp bilerler. Bu ýerde halylar, şaý-sepler, dokma önümleri, gurluşyk önümleri, öý we senagat üçin niýetlenen himiýa serişdeleri, azyk önümleri we ş.m. görmek bolýar.
Şeýle hem bu sergi görkeziş meýdançalary, türkmen-özbek hyzmatdaşlygyny has-da ösdürmäge we hyzmatdaşlygyň täze ugurlaryny ýola goýmaga gönükdirilen işewür duşuşyklaryň hem-de gepleşikleriň geçiriljek ýeri bolup hyzmat eder.
