Disney we Ýaponiýanyň Oriental Land Company kompaniýasy 2029-njy ýyldan Tokiodan gatnap başlajak täze kruiz gämisini gurmak boýunça bilelikdäki taslamany mälim etdiler. Bu barada Reuters habar berýär.
2 mlrd dollar bahaly taslama 4 müň ýolagça we 1,5 müň ekipaž agzasyna niýetlenen gäminiň gurluşygyny göz öňünde tutýar. Onuň gurluşygy geljek ýylyň ýazynda başlar.
Gäminiň ulanylyşa goýberilenden soň ilkinji ýyllar, takmynan, 100 mlrd ýena ($621,8 mln) ýyllyk girdeji getirmegine garaşylýar.
“Ýaponiýadan gatnaw, bilşimiz ýaly, Disney-iň iň uly muşdaklarynyň biri bolan ýapon myhmanlary üçin deňizde dynç alşy has elýeterli eder” – diýip, Disney Signature Experiences-iň prezidenti Tomas Mazlum belledi.
Disney Cruise Line “The Walt Disney Company-nyň” golçur kompaniýasydyr. Ol 1996-njy ýylda hasaba alyndy. Täze gämi kompaniýanyň häzirki wagtda Disney Magic, Disney Wonder, Disney Dream we Disney Fantasy gämilerini öz içine alýan flotunda bäşinji bolar. Olaryň ählisi XX asyryň 30-njy ýyllarynyň birmeňzeş stilinde ýerine ýetirilen we hökmany ýagdaýda çagalaryň söýgüli gahrymany Mikki Mausyň keşbi bilen iki sany gyzyl tüsse turbasy bardyr.
Disney Cruise Line dürli sebitlerde gatnawlary hödürleýär: Ýewropa, Panama kanaly, Karib basseýni, Alýaska we Ýuwaş umman, Bagama suwlary, şeýle-de transatlantik gezelençler.
