2024-nji ýylyň ýanwar-aprel aýlarynda Başkortostan bilen Türkmenistanyň arasyndaky haryt dolanyşygy geçen ýylyň degişli döwri bilen deňeşdirilende 3,6 esse artdy. Bu barada Başkortostan Respublikasynyň daşary ykdysady aragatnaşyklar we kongres işi ministri Margarita Bolyçewa MK neşirine habar berdi.
Onuň bellemegine görä, bellenilen döwürde Başkortostandan Türkmenistana ibermeler 5,1 esse artdy. Himiýa senagatynyň önümleri we kauçuk eksportyň esasy bölegini düzdi (61,1%), bulardan başga-da, azyk harytlary we çig mallar (37,2%) bar. Ibermeleriň sanawyna şeýle hem maşyngurluşyk önümleri, agaz we sellýuloza-kagyz önümleri girdi.
2023-nji ýylda Türkmenistan Başkortostanyň kontragent-ýurtlarynyň sanawynda 22 dereje ýokary süýşüp, 27-nji orny eýeledi. Şonda bu iki ýurduň özara haryt dolanyşygy 2022-nji ýyl bilen deňeşdirilende 4 esse artdy.
Bellenilişi ýaly, ibermeleriň möçberlerini mundan beýläk hem artdyrmak üçin hyzmatdaşlygyň ileri tutulýan ugurlarynyň hatarynda derman serişdeleri, motorly ulag serişdeleri, obasenagat toplumy, lukmançylyk, syýahatçylyk, maşyngurluşygy, ýeňil senagat, moda we dizaýn ugurlary bar.
