Mary welaýatynyň gallaçylary Watan harmanyna 345 müň tonnadan gowrak bugdaý hasylyny tabşyryp, şertnamalaýyn borçnamalaryny üstünlikli ýerine ýetirdiler.
Mälim bolşy ýaly, daýhanlar döwletimiz tarapyndan tehniki hyzmatlar, mineral dökünler, ýokary hilli tohumlar bilen üpjün edilýär, öňdebaryjy daşary ýurt kompaniýalarynyň döwrebap tehnikalary yzygiderli satyn alynýar. Tabşyrylan önüm üçin kärendeçiler bilen hasaplaşyklar öz wagtynda geçirilýär. Bularyň ählisi oba hojalyk işlerinde ýokary netijeleriň gazanylmagyna ýardam berýär.
Mary welaýatynyň gallaçylary Türkmenistanyň Prezidentine berk jan saglyk, uzak ömür, Watanymyzyň abadançylygynyň, halkymyzyň rowaçlygynyň bähbidine alyp barýan köpugurly işlerinde täze üstünlikleri arzuw edip, mundan beýläk-de tutanýerli zähmet çekjekdiklerine, oba hojalyk önümleriniň öndürilýän möçberini yzygiderli artdyrjakdyklaryna ynandyrdylar.
Mundan öň, ýurdumyzyň beýleki welaýatlarynyň gallaçylary hem şertnamalaýyn borçnamalaryny üstünlikli ýerine ýetirdiler. Hususan-da, Daşoguz welaýatynda 270 müň tonnadan gowrak, Ahal welaýatynda 400 müň tonnadan gowrak, Lebap welaýatynda bolsa 310 müň tonnadan gowrak bugdaý hasylynyň ýygnalandygy barada habar berildi.
