Tesla-nyň Berlindäki zawodynyň golaýynda Ikinji jahan urşy döwrüniň bombasy zyýansyzlandyryldy. Grýunhaýda Tesla zawodyny giňeltmek üçin niýetlenen çäkde partlaman galan 250 kilogramlyk bomba tapyldy diýip, Teslarati ýazýar.
Bomba ýük ulaglarynyň magistralyny çekmek işleri gidýän mahalynda tapyldy.
Brandenburgyň Daşky gurşawy goramak ministrliginiň berýän habaryna görä, bombany ulagly äkitmek mümkin bolmansoň, ony ýerinde gözegçilik astynda partlatmak arkaly ýok etmek kararyna geldi.
Bu Tesla Gigafabriginiň töwereginde Ikinji jahan urşy döwründen galan ok-därileriň ilkinji gezek tapylyşy däl. 2019-njy ýylda zawod taslamalaşdyrylýan wagtynda hem hünärmenler partlamadyk snarýadlary hem tapypdylar.
Ýerli häkimiýetler çägiň howply jisimlerden doly arassalanmagyny üpjün etmek üçin bu ýerde goşmaça gözleg işleriniň geçiriljekdigini habar berdiler.
