Rinodaky Newada uniwersitetiniň alymlar topary kaktus armydynyň bio ýangyjyň geljegi uly çeşmesi bolup biljekdigini ýüze çykardylar. Ol kän suw talap etmeýär we ösümligi gurak sebitlerde hem ösdürip ýetişdirip bolar.
Ösümlikleriň 14 görnüşi üç ýyllap synagdan geçirende olaryň käbiriniň ýokary hasyllydygy we ep-esli mukdarda biomassany öndürmäge ukyplydygy anyklandy.
Aýratynam tikenli ýabany armyt bilen onuň tikensiz görnüşiniň esasynda döredilen gibrid görnüş ünsi özüne çekdi. Bu gibrid diňe bir ýokary hasyllylyk görkezmek bilen çäklenmän, eýsem örän çydamly we aňsat köpelgiç bolup çykdy.
Barlaglar kaktus armytlarynyň howanyň üýtgemegine çydamlydygyny we beýleki ösümliklere garanyňda, ep-esli az suw talap edýändigini, olaryň biomassasyny sygyr dersi we beýleki galyndylar bilen bilelikde ekologiýa taýdan arassa ýangyç öndürmek üçin ulanyp boljakdygyny görkezdi.
Häzirki wagtda kaktus armydy mallara iým hökmünde we aşpezlikde ulanylýar, ýöne onuň bio ýangyjyň çeşmesi hökmündäki potensialy indi açylyp başlandy. Geljekki barlaglar onuň önümçiligini optimallaşdyrar we bu çig maldan alnan bio ýangyjy has elýeterli eder.
