Alymlar Awstraliýanyň Kwinslend ştatynyň günbatarynda galyndylary tapylan pterozawryň täze görnüşini suratlandyrdylar. Bu barada Phys.org ylmy žurnaly ýazýar.
Nýu-Kertin uniwersitetiniň ýolbaşçylygynda geçirilen barlagda galyndylaryň anyanguera pterozawrlar toparynyň wekili bolan Haliskia peterseni-ä degişlidigi anyklandy.
Anyanguera pterozawrlarynyň toparlary bütin dünýäde, şol sanda häzirki Braziliýanyň, Angliýanyň, Marokkonyň, Hytaýyň, Ispaniýanyň we ABŞ-nyň çäginde ýaşapdyrlar.
Süňkler 2021-nji ýylda Kronozawrlar muzeýiniň dolandyryjysy Kewin Petersen tarapyndan tapylanam bolsa, alymlar olary indi anyklap bildiler.
Haliskia peterseni, takmynan, 100 million ýyl ozal ýaşap geçen, ganatlarynyň gerimi 4,6 metr töweregi bolan gorkunç uçýan süýrenijidir. Bu nusga anyangueryň ýa-da Awstraliýada şu wagta çenli tapylan beýleki pterozawryň iň doly gaňňylydyr. Ol aşaky we ýokarky äňleri, dişleri, oňurgany, gapyrgany, ganat süňklerini we aýagyň bir bölegini öz içine alýar.
Alymlaryň pikiriçe, Haliskia peterseni öz etlek dilini ulanyp balykdyr kellesi aýakly mollýusklar bilen iýmitlenen bolmaly. Bu pterozawryň galyndylary beýleki gadymy deňiz haýwanlarynyň galyndylaryny hem özünde jemleýän Kronozawr muzeýiniň ýygyndysynyň üstüni ýetirdi.
