Tailandyň Mahidol uniwersitetiniň alymlary ananas ýapraklarynyň süýümlerinden tebigy derä täze ekologiýa taýdan arassa alternatiwany işläp taýýarladylar. “Ananas derisi” diýlip atlandyrylan material adaty deri material bilen deňeşdirip boljak berklige eýe we bar bolan wegan analoglaryndan öňe geçýär diýip, New Atlas ýazýar.
Ananas derisini öndürmek prosesi ýönekeý bolup, himiki önümleriň ýa-da plastigiň ulanylmagyny talap etmeýär. Ananasyň ýapraklary arassalanýar, ownadylýar we tebigy kauçuk bilen garylýar. Soňra alnan garyndy 70 gradus temperaturada basylýar we gaýtadan işlenýär. Netijede, ýyrtylma çydamly, çeýe material alynýar.
Synaglaryň netijesinde ananas derisi 12,3 MPa berkligi görkezdi, bu kömeleklerden taýýarlanýan analog material bilen deňeşdirilende 60 esse ýokarydyr. Ylmy gözlegçiler materialy tebigy derä has meňzetmek üçin onuň taktil häsiýetlerini gowulandyrmagyň üstünde işlemegi dowam etdirmegi meýilleşdirýärler.
Ananas derisi egin-eşikleriň, aýakgaplaryň, ýantorbalaryň we beýleki aksessuarlaryň önümçiliginde giňden ulanylyp bilner. Ol adaty derä ekologiýa taýdan arassa alternatiwa bolup, moda pudagynyň durnukly ösüşi üçin geljegi uly materialdyr.
