2024-nji ýylda Türkmenistanyň Ahal, Lebap we Mary welaýatlarynda 7-nji iýunda, Balkan we Daşoguz welaýatlarynda bolsa, 14-nji iýunda galla oragyna başlanar. Anna güni geçirilen Hökümet mejlisinde Prezident Serdar Berdimuhamedow galla oragyna girişmegiň senesini belläp, hormatly ýaşulularymyzdan galla oragyna «Bissimilla!» bilen başlap bermeklerini haýyş etdi.
Wise-premýer T.Atahallyýewiň belleýşi ýaly, häzirki wagtda ösdürilip ýetişdirilen bugdaý hasylyny gysga wagtda we ýitgisiz ýygnap almak maksady bilen, galla oragyna girişmäge taýýarlyk işleri ýokary depginlerde alnyp barylýar.
Serdar Berdimuhamedow galla oragyna köpçülikleýin girişmek we galla möwsümini talabalaýyk geçirmek üçin guramaçylyk işleriniň ähmiýetine ünsi çekdi we bu babatda degişli tabşyryklary berdi.
