Ýaponiýanyň Toyota awtoulag ägirdi Hytaýyň BYD kompaniýasynyň peýdasyna öz gibrid ulgamyndan el çeker diýip IXBT habar berýär.
Hytaýyň metbugat çeşmeleri Toyota-nyň ýakyn iki-üç ýylda çykjak birnäçe täze modelini BYD PHEV DM-i gibrid platformasyna geçirjekdigini bellediler. Platforma bir bak benzin bilen 2000 km aralygyň geçilmegini üpjün eder, bu bolsa Ýaponiýanyň awtoulag öndürijisiniň öz gibrid ulgamlaryndan ep-esli ýokary bolar diýlip garaşylýar.
Toyota Hytaý bazary üçin çykarylan E+Corolla, Lewin we RAV4 modellerinde ulanylan öz THS (Toyota Hybrid System) platformasyndan ýüz öwrer. BYD DM-niň täze, bäşinji nesliniň platformasy has täsirli we 100 km üçin bary-ýogy 2,9 litr ýangyç sarp etmäge mümkinçilik berýär. BYD-niň şeýle platforma esasly ilkinji awtoulagy şu aýyň ahyrynda Hytaýda hödürlener.
Toyota-yň eýýäm BYD bilen hyzmatdaşlyk edýändigini bellemelidiris: 2021-nji ýylda BYD-nyň bilelikdäki Toyota Electric Vehicle Technology zawody döredildi we 2023-nji ýylda BYD Blade akkumulýatorlary we elektrik hereketlendirijisi bilen enjamlaşdyrylan Toyota bZ3 elektrik ulagy bazara çykdy.
Mundan başga-da, Toyota-yň Hytaýda döwlet eýeçiligindäki awtoulag öndürijileri bilen iki sany bilelikdäki kärhanasy bar: First Automobile Works bilen FAW-Toyota we Guangzhou Automobile Group bilen GAC-Toyota.
