Kanadada Dalhauzi uniwersitetiniň barlagçylary 2018-2022-nji ýyllar aralygynda 84 döwletde plastik hapalanmagynyň auditini geçirdiler. Alnan netijelere görä, Coca Cola we PepsiCo bu görkeziji boýunça lider boldy. Ýüze çykarylan plastik zibilleriniň umumy möçberiniň, degişlilikde, 11%-i we 5%-i bu kompaniýalaryň paýyna düşdi diýip, Anadolu agentligi habar berýär.
Olaryň yzyndan Nestle we Danone (hersi 3%) gelýär, şeýle hem Altria (2%). Bu kompaniýalar umumylykda, ylmy barlagyň dowamynda bellige alnan plastik zyňyndylarynyň 25%-ine golaýy üçin jogapkärdir. Barlagyň netijeleri Science Advances žurnalynda çap edildi.
«Bu kompaniýalar dünýäde iň iri kompaniýalaryň biridir we olaryň dünýä ýurtlarynyň ählisine elýeterliligi bar" - diýip, barlagçy Toni Uoker teswirleýär.
Şol bir wagtda, öwrenilen zyňyndylaryň ýarysyna golaýynyň "haýsy kompaniýa tarapyndan öndürilendigini ýüze çykaryp bolmady" diýip habarda bellenilýär.
