Bilefeld uniwersitetiniň barlagçylary agramy has pes bolup doglan çagalaryň, ortaça alanyňda, ýetginjekligiň irki döwründe akyl ukyplaryny anyklaýan synaglarda beýlekilerden pes netije görkezýändiklerini ýüze çykardylar.
Bu netijeler Germaniýanyň «TwinLife» taslamasynyň 4 müňden gowrak gatnaşyjysynyň maglumatlaryna seljerme geçirmek esasynda alyndy. Alymlar birmeňzeş şertlerde önüp-ösen ekizleri özara deňeşdirdiler, bu bolsa hamylalyk döwründe täsir eden şertleriň derejesini has takyk kesgitlemäge mümkinçilik berdi.
Barlaglar takmynan 12 ýaş töweregindäki döwürde, has uly agramda doglan ekizleriň adatça, akyl-paýhas soragnamalaryna beýlekilerden gowy jogap berendigini görkezdi. Şol bir wagtyň özünde, 18 ýaş töwereginde bu tapawutlar ýok diýen ýaly bolup gitdi we deňeşdirmek zerurlygy aradan aýryldy.
Işiň awtorlarynyň pikirine görä, enäniň göwresindäki ösüş şertleri irki akyl ösüşine täsir edip biler, ýöne wagt geçmegi bilen bu parhyň ýitip, adaty çagalar bilen deňleşmek mümkinçiligi-de uludyr.
Barlagçylar çaganyň durmuşynyň ilkinji ýyllaryndaky akyl ösüşine enäniň saglygyna göwrelilik döwründäki edilen idegiň hiliniň-de ýiti täsiriniň bardygyny ýatladýarlar.
