Şu gün, 8-nji maýda günüň ikinji ýarymynda Prezident Serdar Berdimuhamedow Russiýanyň Prezidenti Wladimir Putiniň çakylygy boýunça 1941 - 1945-nji ýyllaryň Beýik Watançylyk urşunda gazanylan Ýeňşiň 79 ýyllygy mynasybetli guraljak dabaralara hormatly myhman hökmünde gatnaşmak maksady bilen, Russiýa Federasiýasyna iş sapary bilen ugrady.
Aşgabadyň Halkara howa menzilinde Serdar Berdimuhamedowy resmi adamlar ugratdylar.
1941 - 1945-nji ýyllaryň Beýik Watançylyk urşy bilelikdäki taryhyň unudylmajak esasy sahypalarynyň biridir. Uruş ýyllarynda söweşlerde we tylda görkezilen beýik edermenlik, mertlik, deňsiz-taýsyz gahrymançylyk biziň halklarymyzyň hakydasynda ebedilik galdy. 9-njy maý - Ýeňiş güni Garaşsyz Döwletleriň Arkalaşygynyň halklaryny birleşdirýän taryhy ähmiýetli senedir.
Şunuň bilen baglylykda, Türkmenistanyň Prezidentiniň Beýik Watançylyk urşunda gazanylan Beýik Ýeňiş mynasybetli guralýan dabaralara yzygiderli gatnaşmagy aýratyn bellenilmäge mynasypdyr.
Birnäçe sagatdan hormatly Prezidentimiziň uçary Russiýa Federasiýasynyň paýtagtynyň "Wnukowo-2" Halkara howa menzilinde gondy. Bu ýerde döwlet Baştutanyny resmi adamlar mähirli garşyladylar.
Türkmenistanyň Prezidentiniň Russiýa Federasiýasyna iş sapary dowam edýär.
