Prezident Serdar Berdimuhamedow we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň we Russiýa Federasiýasynyň Gahrymany, Kosmos işi boýunça “Roskosmos” döwlet korporasiýasynyň tälimçi-kosmonawt-synagçysy, kosmonawtlar toparynyň serkerdesi Oleg Kononenko hünär baýramy — Kosmonawtika güni mynasybetli tüýs ýürekden gutlaglaryny, iň gowy arzuwlaryny iberdiler.
“Siz kosmonawtikanyň taryhynda täze sahypalary açdyňyz. Biz Siziň älem giňişligini öwrenmek we özleşdirmek işinde ýeten derejäňize buýsanýarys” diýip, döwlet Baştutany hatynda belledi.
“Siz abraýly hünäriň eýesi bolmak bilen, umumadamzat durmuşynyň has-da gowulanmagyna getirjek häzirki zaman ylmynyň ösüşine yzygiderli goşant goşýarsyňyz” diýlip, Gurbanguly Berdimuhamedowyň gutlag hatynda bellenilýär.
Oleg Kononenko häzirki wagtda kosmosa uçuşlarynyň umumy dowamlylygy boýunça dünýä rekordynyň eýesidir. 2024-nji ýylyň 5-nji iýunynda onuň kosmosda geçiren wagty müň güne, ýyllyk ekspedisiýanyň ahyrynda bolsa 1100 güne çenli ýeter. Hatda Oleg Kononenko 21-nji iýunda kosmosda 60 ýaşyny bellär. Ol 4-nji fewralda kosmosda 878 gün geçiren Gennadiý Padalkanyň rekordyny täzeledi.
