Şu ýylyň 27-nji martynda Ýaponiýanyň Tokio şäherinde Türkmen-ýapon kiçi we orta telekeçileriniň işewürler forumyny geçirmek meýilleşdirilýär. Foruma görülýän taýýarlyk barada wise-premýer B.Atdaýew döwlet Baştutanyna hasabat berdi.
Forumyň barşynda maýa goýum, senagat, ulag we logistika, şeýle hem hususy ulgamlarda iki ýurduň arasyndaky hyzmatdaşlygy ösdürmegiň mümkinçiliklerine garalar.
Şunuň bilen birlikde, Ýaponiýanyň Osaka şäherinde geçiriljek “EKSPO 2025” Bütindünýä sergisinde Türkmenistanyň Milli pawilýony hem-de onda alnyp barylýan işler bilen tanyşdyrmak göz öňünde tutulýar.
Serdar Berdimuhamedow Tokio şäherinde geçiriljek işewürler forumyny ýokary guramaçylykly geçirmegiň wajypdygyna ünsi çekip, wise-premýere onuň ýokary guramaçylyk derejesini üpjün etmegi tabşyrdy.
