Aziýaly piller aradan çykan çagalaryny jaýlanlarynda hoşlaşyk däplerini berjaý edýärler diýip, Journal of Threatened Taxa (JTT) ylmy neşirinde aýdylýar.
Günbatar Bengaliýanyň tokaýlary dolandyryş bölüminiň hem-de Hindistanyň Ylmy bilim we gözleg institutynyň alymlary pilleriň jaýlaýyş çäresini guraýandyklaryny, şonda uly pilleriň çaga piliň maslygyny göwresinden we el-aýaklaryndan tutup getirýändiklerini anykladylar. Şondan soň jaýlamak üçin suwaryş akabalaryny ulanyp, maslygy arkan ýatyryp, aýaklaryny ýokary edip gömýärler.
Gözlegçiler: "Şeýle däp-dessurlaryň diňe çagalar babatynda berjaý edilýändigini gördük, sebäbi uly piller daşamak üçin gaty agyr" – diýip gürrüň berdiler.
Jaýlanlaryndan soň süri holtumy bilen birsalym surnaý çalýar we gaty gygyrýar, soň bolsa başga ugur bilen gabryň ýanyny terk edýär.
Aziýaly pilleriniň erkinlikde ýaşaýanlarynyň ömri ortaça 60-70 ýaş. Bu haýwanlara ýitip gitmek howpunyň abanýandygyny bellemelidiris. Hasaplamalara görä, olaryň ýabany tebigatda 26 000 sanysy galypdyr, olaram, esasan, Hindistanda we Günorta-Gündogar Aziýada ýaşaýar.
