Özbegistanyň Prezidenti Şawkat Mirziýoýew 28-nji fewralda “Özbegistan – Türkmenistan” erkin söwda zolagyny döretmek baradaky karara gol çekdi. Respublikanyň Adalat ministrliginiň hukuk maglumatlary kanalynda habar berlişi ýaly, 3,1 g meýdany eýeleýän zolak Horezm welaýatynyň Şawat sebitinde ýerleşer. Bu zolagy “Hazarasp” erkin ykdysady zolagynyň müdirligi dolandyrar.
Bilelikdäki taslama laýyklykda, täze söwda zolagynda:
- döwrebap tehnologiýalaryň esasynda önümleri kabul etmek, saklamak we tertipleşdirmek hyzmatlary hödürlener;
- müşderiler üçin “Bir penjiräniň” we interaktiw mehanizmleriň esasynda gümrük, salgyt, sertifikasion, fitosanitar, weterinariýa, transport hyzmatlary, bank we walýuta çalşygy, ykjam aragatnaşyk, şeýle-de lukmançylyk, myhmanhana, awtotransport we beýleki hyzmatlar dörediler;
- diňe Özbegistanda we Türkmenistanda öndürilen önümleriň satuwy guralar;
- bölek söwda amallaryna rugsat berýän “erkin gümrük zolagy” gümrük režimi hereket eder;
- söwda zolagyndaky binalar we desgalar elektron onlaýn auksionlaryň esasynda telekeçilik subýektlerine kärendesine berler.
Erkin söwda zolagyna giriş aýratyn barlag-geçiriş nokatlary arkaly gurnalar. Türkmenistanyň raýatlary we daşary ýurtly myhmanlary bu ýerde wizasyz 15 gün bolup bilerler.
Zolak uzaltmak mümkinçiligi bilen 30 ýyl üçin döredilýär.
Bu taslamany durmuşa geçirmek üçin esas bolup 2022-nji ýylyň oktýabr aýynda gol çekilen döwletara şertnamasy hyzmat etdi. Şeýle-de, Mirziýoýewiň Aşgabada sapary wagtynda Şawat – Daşoguz serhet geçelgesinde söwda zolagynyň gurluşygy başlandy.
