20-nji fewralda Hindistanyň Türkmenistanda täze bellenen Adatdan daşary we Doly ygtyýarly ilçisi hanym Madhumita Hazarika Bhagat Prezident Serdar Berdimuhamedowa ynanç hatyny gowşurdy.
Diplomat döwlet Baştutanyna Hindistan Respublikasynyň Prezidenti Draupadi Murmunyň we ýurduň Premýer-ministri Narendra Modiniň mähirli salamyny hem-de ähli türkmen halkyna iň gowy arzuwlaryny ýetirdi.
Duşuşygyň barşynda bellenilişi ýaly, Hindistan Respublikasy Günorta Aziýa sebitinde Türkmenistanyň iň möhüm hyzmatdaşlarynyň biridir.
Türkmenistan we Hindistan söwda-ykdysady ulgamda, şol sanda ýangyç-energetika we ulag ulgamlary, oba hojalygy, dokma senagaty ýaly pudaklarda netijeli hyzmatdaşlyk edýärler. Özara bähbitli hyzmatdaşlygy uzakmöhletli esasda ösdürmek üçin uly mümkinçilikler bar. Munuň özi, ilkinji nobatda, energetika we ulag pudaklarynda alnyp barylýan hyzmatdaşlyga degişlidir.
Şunuň bilen baglylykda, Türkmenistan – Owganystan – Pakistan - Hindistan (TOPH) transmilli gaz geçirijisiniň taslamasynyň durmuşa geçirilmeginiň ähmiýeti bellenildi.
Saglygy goraýyş ulgamy hem ikitaraplaýyn hyzmatdaşlygyň möhüm ugurlarynyň biri hökmünde görkezildi. Köp ýyllaryň dowamynda bu ulgamda netijeli gatnaşyklar ýola goýuldy. Derman serişdelerini bilelikde öndürmek boýunça hindi kompaniýalary bilen netijeli hyzmatdaşlyk munuň aýdyň mysaly bolup durýar.
Ynsanperwer ulgamdaky gatnaşyklar – ylym, bilim we medeni ugurlar boýunça hyzmatdaşlyk döwletara gatnaşyklaryň aýrylmaz bölegi bolup durýar.
Diplomat öz tarapyndan däp bolan dostlukly döwletara gatnaşyklary pugtalandyrmaga hemmetaraplaýyn ýardam berjekdigine ynandyrdy.
