2023-nji ýylyň dördünji çärýeginde Ýewropa yklymyna syýahatçylyk akymy pandemiýadan öňki derejesine golaýlady. Bu barada Ýewropanyň syýahatçylyk komissiýasynyň (ETC) maglumatlaryna salgylanyp, Interfax.ru habar berýär.
“2023-nji ýylyň soňky çärýeginde daşary ýurtly syýahatçylaryň gelmeleriniň sany 2019-njy ýyldaky görkezijiden 1,6%, myhmanhanalarda gijelerine galmalaryň sany bolsa bary-ýogy 0,6% pes boldy. Bu tutuş Ýewropa boýunça gezelençlere bolan islegiň durnuklydygyny görkezýär. Bu tendensiýanyň 2024-nji ýylda hem saklanmagyna garaşylýar” – diýlip, ETC-niň habarynda aýdylýar.
Komissiýa syýahatçylyk pudagynyň Ýewropa sebitinde işjeň gezelençleriň we Demirgazyk Amerikadan hem Aziýa-Ýuwaş umman sebitinden syýahatçylaryň sanynyň artmagynyň hasabyna dikelýändigini belleýär. 2023-nji ýylda Germaniýadan, Fransiýadan we Niderlandlardan syýahatçylar Ýewropa boýunça has köp syýahat etdiler.
Komissiýanyň maglumatlaryna görä, Hytaýdan syýahatçylyk akymy pandemiýadan öňki 2019-njy ýyldaky görkezijiden üçden bir dikeldildi. 2024-nji ýylda onuň pandemiýadan öňki görkezijiniň 61%-ine barabar bolmagyna garaşylýar.
