Gyrgyzystanyň Aşgabatdaky ilçisi Azizbek Madmarow öz ýurdunyň paýtagtyndaky iri ýylylyk elektrik stansiýasynyň işiniň wagtlaýyn durmagy bilen bagly iberilen dostluk kömegi üçin Türkmenistanyň ýolbaşçylaryna we halkyna hoşallyk bildirdi. Bu barada ol 7-nji fewralda Gyrgyzystanyň ilçihanasynyň binasynda köpçülikleýin habar beriş serişdeleriniň wekilleri bilen geçiren duşuşygynda aýtdy.
2000 tonnadan ybarat dostluk kömegi Türkmenistanyň Prezidentiniň Buýrugy boýunça dostluk kömegi hökmünde iberildi. Ýakynda Gyrgyzystanyň Prezidenti Sadyr Žaparow Türkmenistanyň döwlet Baştutany bilen telefon söhbetdeşliginde iberilen kömek üçin hoşallyk bildirdi.
Žurnalistler bilen bolan söhbetdeşlikde ilçi Azizbek Madmarow iki ýurduň arasyndaky hoşniýetli goňşuçylyk gatnaşyklary barada durup geçdi. Bellenilişi ýaly, iki ýurduň döwlet Baştutanlarynyň yzygiderli esasda gepleşikleri geçirmegi ikitaraplaýyn hyzmatdaşlygy hil taýdan täze derejä çykardy. Şeýle hem ýurtlaryň energetika pudagynda netijeli hyzmatdaşlyk edýändikleri bellendi.
Türkmenistan Gyrgyzystana elektrik energiýasyny, awtoulag ýangyjyny we awiasion kerosinini iberýär. Türkmenistandan Gyrgyzystana eksport edilýän harytlaryň hatarynda gurluşyk serişdeleri, dokma we oba hojalyk önümleri hem bar. Türkmenistanda ösdürilen ýyladyşhana pomidory gyrgyz bazarynyň 70-80 göterimine golaýyny düzýär. Öz gezeginde, Gyrgyzystan Türkmenistana elektrik enjamlary, yşyklandyryjy lampalary, diodlary we ýarym geçirijileri, himiýa önümlerini eksport edýär.
Umuman, Gyrgyz Respublikasy bilen Türkmenistanyň arasynda söwda dolanyşygy artýar. Ilçiniň sözlerine görä, 2023-nji ýylda iki ýurduň 100 million dollara barabar söwda dolanyşygynyň amala aşyrylandygy çaklanylýar. Şunda heniz doly güýjünde ulanylmadyk mümkinçilikleriň bardygy hem bellenildi. Geçen ýyl ilçihana Türkmenistanyň raýatlaryna köp sanly işewürlik wizasyny resmileşdirdi.
Ilçi şeýle hem geçen ýyl Aşgabatda geçirilen işewürlik maslahatyna gatnaşmaga 20-den gowrak gyrgyz kompaniýasynyň gelendigini ýatlady. Ilçiniň sözlerine görä, iki ýurduň arasynda söwda-ykdysady gatnaşyklar yzygiderli ösmegini dowam etdirer.
