Moskwada geçiriljek Fight Nights Global ýaryşynda garyşyk söweşiň (MMA) russiýaly wekili Artýom Atakulow bilen türkmen türgeni Abdulla Babaýew duşuşar. Bu barada TmCars-a Gala Sports Management-iň wekili Ilaman Beknazarow habar berdi.
Duşuşyk 23-nji fewralda geçiriler. Oňa göni ýaýlymda "Udar" teleýaýlymynda Aşgabat wagty bilen 21:00-da tomaşa edip bilersiňiz.
Abdulla Babaýew - söweş sambosy boýunça halkara derejeli sport ussady. Ol üç gezek Dünýä kubogyny aldy, pankration boýunça Aziýanyň we dünýä birinjiliginiň çempiony.
Öň TmCars Abdulla Babaýewiň professional arenada çykyşyna taýýarlygy bilen türkmen MMA-synyň belli wekili Rustam Kuraýewiň meşgullanjakdygyny habar beripdi.
Abdulla Babaýew 2023-nji ýylyň dekabrynda Gala Sports Management bilen şertnama baglaşdy.
