Ýewropa we halkara maliýe institutlary Merkezi Aziýada durnukly ulag aragatnaşygynyň goldawyna we maýa goýumyna 10 mlrd ýewro bölüp berer. Bu barada Global Gateway maýa goýum forumynyň açylyşynda ÝB-niň söwda meseleleri boýunça komissary Waldis Dombrowskis habar berdi diýip, Report belleýär.
Iki günlük foruma Türkmenistanyň, Gyrgyzystanyň, Özbegistanyň, Gazagystanyň we Täjigistanyň hökümet wekilleri we ulag pudagynyň ýolbaşçylary, şeýle-de beýleki ýokary wezipeli adamlar gatnaşýar.
ÝB-niň komissary forumyň açylyş dabarasynda çykyş etmek bilen, Ýewropa Komissiýasynyň we Ýewropa Maýa goýum bankynyň Merkezi Aziýanyň sebitden ulag geçelgesini döretmek üçin strategiki ulag infrastrukturasyna 1,5 mlrd ýewro maýa goýmaga taýýardygyny aýtdy.
“Uzynlygy 11 müň km bolan ulag geçelgesi sebitlerimizi 15 gün ýa-da ondan hem az ýol dowamlylygy bilen birleşdirmeli. Biz bu geçelgäni bäsdeşlige ukyply etmeli. Biz anyk netijeleri gazanmak isleýäris. Şonuň üçin Ýewropa komissiýasy we Ýewropa Maýa goýum banky Merkezi Aziýanyň ulag mümkinçiliklerine 1,5 mlrd ýewro maýa goýmagy maksat edinýär” – diýip, Dombrowskis aýtdy.
Forumyň guramaçylary Hazarüsti ulag geçelgesini gysga möhletde Ýewropany we Merkezi Aziýany birleşdirýän döwrebap, multimodal we netijeli ugra öwürmegiň zerurdygyny ara alyp maslahatlaşdylar.
