ChatGPT grafiki prosessorlara (GPU) we beýleki ýokary öndürijilikli çiplere bolan islegi ep-esli ýokarlandyrdy. Olara isleg şeýle bir artdy welin, bar bolan üpjünçilik hatarlary ony kanagatlandyrmaga ýetişip bilmeýär. ChatGPT-niň döredijilerinden biri, OpenAI-yň öňki başlygy Sem Altman bu meseläni özbaşdak çözmek we öz önümçiligini ýola goýmak kararyna geldi diýip, Business Insider-e salgylanýan Inc. habar berýär.
Häzirki wagtda bu çipler emeli aň prosessorlar bazaryna gözegçilik edýän birnäçe kompaniýa tarapyndan öndürilýär. Nvidia H100 grafiki prosessorlaryna (GPU) – iň gerekli bölege bolan islegiň ýokarylygy sebäpli iň uly kuwwata eýe bolup, olaryň hersiniň bahasy 40 000 dollardan ýokary bolup biler.
Bloomberg çeşmesiniň habar bermegine görä, Altman iri maýadarlary täze AI çip kärhanasyny goldamaga çekmek isleýär, bu bolsa kompaniýasyna çip üpjünçiligine has köp gözegçilik etmäge mümkinçilik bererdi.
Adatça, Nvidia ýaly kompaniýalar diňe çipleri işläp taýýarlaýarlar we Taýwanyň TSMC we Intel ýaly gymmat hem-de çylşyrymly önümçilik zawodlaryny dolandyrýan hünärmenlere önümini berýärler. Ýöne birnäçe tehnologiýa kompaniýalary özlerini ösdürip başladylar. Mysal üçin, noýabr aýynda Microsoft uly dil modeli (LLM) okuwyny göz öňünde tutup döredilen täze Azure Maia AI çipini hödürledi. Şol bir wagtyň özünde, Google şuňa meňzeş maksat bilen täze çip dizaýnyny hödürledi.
Uly korporasiýalaryň köpüsiniň mümkin boldugyça köp çip almak üçin göreşýändikleri bellendi. Şeýlelikde, Mark Sukerberg 2024-nji ýylyň ahyryna çenli jemi 18 milliard dollarlyk grafiki prosessor satyn almak meýilnamasyny yglan etdi.
